IMPHILO YEMAMASWATI NGEMBI KWEKUFIKA KWEBADZESHI

INDZABUKO YEMASWATI

Emaswati sive lesachamuka enyakatfo ne-Afrika kanye nato tonkhe letinye tive letinsindvu lekutsiwa temdzabu ngaphandle kwebelumbi ngobe bona batichamukela ngesheya kwetilwandle eYurophu. Letive letinsudvu setakhe eNingizimu ne-Afrika Matsebula (1952:1) utsi: bekunebantfu nemalawu. Labantfu behla kancane ne-Afrika bahamba bakhotsisa tinkhomo netimbuti. Kutsiwa bebahamba kancane ngendlela yekutsi luhambo lwabo kusukela enyakatfo kuya entasi ne-Afrika 1wabatsatsa iminyaka. Letive betihamba ticabana endleleni kubangwa emadlelo loko kwabangela kwehlukana ngemacembu, ngulelo nalelo cembu lalandzela umholi walo. Umholi abeba yinkhosi ecenjini lakhe. Ngulapho labanye bacala kulandzela mswati base batibita ngeligama lakhe Mswati batsi bangemaSwati.

Bekutsi lapho litsi limisile licembu likhotsitsa tinkhomo, kufike lelinye lilihlasele bese liyatfutsa lichubekela embili. Lapho emaSwati atiwa ngekutsi beNguni behla bacondza eDalagubha ngasetitsabeni teLubombo bahlala lapho babuye besuka baya ngeNingizimu lapho bafike batsiwa bakaNkhosi lowacedza Lubombo ngekuhlehletela.

Atsite kube asuke lapho emaSwati ancamula Lubombo aya ngasenshonalanga ngaphasi kwenkhosi Ngwane III. Lapho abese aseyehlukana futsi lamanye ewusa Lubombo ngasemphumalanga lamanye njalo akha ngase Mzinyathi lapho kwakhe emaIllubi. Labanye baya ngasemtfontjeni weliThukela labo baba bakaNdlovu nebakaDlamini labaseNatali kutsiwa bebasitwa ngemaZizi. Lamanye emaSwati esuka eLubonjeni aya eMagudu ngasePhongolo. NgwaneIII waya eSwatini kumbe kaNgwane. Ngwane inkhosi wakha umuti wakhe kaZombodze, wakhotsama ngemnyaka wa-1797 wafihlwa entsabeni Imbilane lapho bekutsiwa kuseMakhosini bukhosi babese butsatfwa nguNdvungunye yena wakhotsama ngemnyaka wa 1815.

Ndvungunye yena walandzelwa yindvodzana yakhe Sobhuza. Sobhuza wabese uyesuka eShiselweni lapho kwakwakhe khona Ndvungunye wayawukwakha dvute netitsaba teMdzimba, lapho bekunemigede khona entela kutsi utawutsi nahlaselwa abhace khona ngobe tatihlaselana njalo letive. Kutsite kusenjalo esuka lamanye emaswati angena enkhabeni yelive akha khona kute kube ngulamuhla labese lelive kutsiwa kuseSwatini.

Sive semaSwati kusukela kadzeni bekusive lesihloniphako lesilandzela buholi tindvuna tikhulu kanye nemakhosi aso. EmaSwati abewati umtsetfo ati kutsi wonkhe umuntfu lokhona eveni wenkhosi nanobe yini lanayo kutsiwa kwenkhosi. Umuntfu labefika kutsiwe uvela enkhosi abehlonishwa kakhulu aphiwe nekudla kutsiwe akuphiwa yena kepha kuphiwa inkhosi.

ngendzabuko yawo emaSwati abesoka kadzeni njengaletinye tive temdzabu. Lokusoka kwacedvwa yinkhosi Mswati II ngobe bekalwa timphi. Kuletinye tikhatsi. bekusuka imphi ihlasele kutfolakale kutsi ngaleso sikhatsi emajaha akhe asokile bese iyancotjwa imphi yakhe ngaleyo ndlela. Wabona kutsi kuncono akucedze nya kusoka emaSwatini.