Tinyanga temnyaka
Kucanjwa kwetinyanga temnyaka
hlela- Bhimbidvwane
Lena inyanga yekucala yemnyaka. Kutsiwa ngu-Bhimbidvwane ngobe kulenyanga kadzeni kwakuba sikhatsi sekubhimbidzeka, loku kusho kudla kakhulu wesutse ngobe kudla lokusha lokunjengembila nalokunye kusuke sekukunyenti, kudliwa likwindla phela.
- Indlovane
Kutsiwa kulenyanga kadzeni kwakuba sikhatsi sekutala kwetindlovu; loku kusivumbulela umlandvo kutsi emaswati ase akha eveni lelalivame tindlovu nomake mhlawumbe tindlovu tase tabakhona kulona leli lakasomhlolo kuze banake kutala nekukhula kwaletilwane.
- Indlovulenkhulu
Tindlovu letitelwe ngendlovana tatibe setitinkhulu kulenyanga
Mabasa: Lesi sikhatsi sekucalisa kungena emakhata ebusika.kwakuba kucala kwekubasa umlilo wekotsa, bafana bavuke bayobasa esangweni batsi bobabe nemajaha baphuma bakhandze umlilo sewukhehlekile botse.
- Inkhwenkhweti
Lena yinyanga yekwekhweta kudla emasimini ngobe kusuke sekusondzele sikhatsi sekufohla emahlanga kwetifuyo.kantsi futs kulenyanag bantfu labahambako sebahamba ngekugijima ngendzaba yemakhata, bahamba ngekukhwekhweta.
- Inhlaba
Lesi sikhatsi sekucala kubhahela kwenhlaba lokukhomba kutsi lilanga lisuke selijikile enyakatfo selibuya nganeno licondza ekucaliseni kwelihlobo. Inhlaba sihlahla lesicalisela kuhluma kwetihlahla lebetihhohlokile emacembe ebusika.
- Kholwane
Kulenyanga kusikhatsi lekucalisa ngaso kuvakala kwenyoni lekutsiwa nguphezukhwemkhono.ngiyo lenyoni lebiketela kutsi kusale kulinywa
- Ingci
Akucondzakali kahle kutsin labadzala babesuselaphi kutsi lenyanga bayibite ngekutsi yingci. Kungenteka kutsi babesusela ekutsini kulenyanga busika busuke sebugcinile ngci, ngobe inyanga inyanga lelandzelako yayisuke seyiyekufata.
- Inyoni
Lena yinyanaga yekucala kutalela kwetinyoni kantsi kulabadzala kwakuba yinyanag lebalulekile kakhulu ngobe kwakuhlanyelwa ngayo emabele labovu emasimini.Emabele labovu phela kwakungusona silimo lesiyinsika yekudla kwebantfu labamnyama bakuleli lakitsi kungakefiki belungu nemimbila emaswati labekawubita ngekutsi ngumlumbi.
- Imphala
Lenyanga yinyanga yekutala kwetinyamatane letibitwa ngekutsi timphala. Letinyamatane tativame kakhulu emahlandzeni nanamuhla isekhona imizotinga yato
- Lweti
kukhona tilwanyane letifute timvivane letinkhulu. Tivame kuhlala tinamatsele etihlahleni tente umsindvo lomkhulu lofute wetimyekevu. Letilwakatana kutsiwa lweti. Ngalesinye sikhatsi ngenca yekushisa emini kuyaye kubekhona lokusaluyezana etigangeni nawubukako ungaboni kahle bese kuta nebutfongo. Ngako ke kuyakhanya kutsi lelibito lalenyanga lasuselwa kuletotintfo letimbili lengitsandza kutisho. Futsi lenyanga iyaye ibitwe ngekutsi yeNkhosi lencane ngobe yinyanga yencwala yebuKhosi bakaNgwane.
- Ingongoni
Lena yinyanga yekutala kwetingongoni nato letitfolakala emahlandzeni.Lenyanga ngalesinye sikhatsi iyaye ibitwe ngekutsi yeNkhosi leNkhulu ngobe yinyanga lekuvame kugidvwa ngayo incwala lenkhulu yebukhosi bakangwane. [1]